Төлбөрийн линк

Төлбөрийн линк (checkout link) нь удирдлагын булангаас үүсгээд хаана ч хуваалцаж болох, дахин ашиглагдах төлбөрийн URL юм. Линк нээгдэх бүрд шинэ checkout үүсч, худалдан авагч ердийн төлбөрийн хуудсаар QPay, SocialPay, Pocket зэрэг сувгаар төлнө.

Линк нь https://byl.mn/h/pay/{slug} хэлбэртэй нийтийн хаяг тул Facebook, Instagram, чат, имэйл, QR код — хаана ч тавьж болно. Вэбсайт, API холболт, код бичих шаардлагагүй.

Checkout-оос юугаараа ялгаатай вэ?

Checkout API-аар үүсгэсэн checkout нь нэг худалдан авалтын хуудас бөгөөд төлөгдмөгц дуусдаг. Төлбөрийн линк нь урт настай: нэг линкээр хэдэн ч харилцагч, хэдэн ч удаа төлбөр хийж болно — нээгдэх бүрд нь шинэ checkout автоматаар үүснэ.

Линк үүсгэх

1. Удирдлагын буланд төслийнхөө Төлбөрийн линк цэсээр орж «Шинэ линк» товч дарна.
2. Дараах талбаруудыг бөглөнө:
   • Нэр (заавал) — 255 тэмдэгт хүртэл. Зөвхөн танд харагдах дотоод нэр; худалдан авагчид харагдахгүй.
   • Төлбөрийн дараах хаяг (сонголттой) — төлбөр амжилттай болсны дараа худалдан авагчийг чиглүүлэх URL. Хоосон үлдээвэл амжилтын мэдээлэл харуулна.
3. Хамгийн багадаа нэг бүтээгдэхүүн нэмнэ (доорх хэсгийг үзнэ үү).
4. Худалдан авагчаас цуглуулах мэдээллээ сонгоно.
5. Хадгалснаар линк үүсч, хуваалцахад бэлэн болно.

Бүтээгдэхүүн заах

Линкийн мөр бүр хоёр төрлийн аль нэг байна:

• Бүртгэлтэй үнэ — Бүтээгдэхүүн цэсэнд бүртгэсэн үнээ сонгоно. Линк тухайн үеийн үнээр зарна: үнэ өөрчлөгдвөл линкээ дахин үүсгэх шаардлагагүй. Барааны үлдэгдэл болон бүтээгдэхүүний хүрээтэй хөнгөлөлт зөвхөн бүртгэлтэй үнэтэй ажиллана.
• Шинэ нэр, дүн — бүтээгдэхүүн бүртгэхгүйгээр нэр (255 тэмдэгт хүртэл) болон нэгж үнээ шууд бичнэ.

Давтагдах үнэ дэмжигдэхгүй

Төлбөрийн линк нь нэвтрээгүй, урьдчилан тодорхойгүй худалдан авагчид зориулагдсан тул давтагдах (recurring) үнэ линк дээр зарагдахгүй. Багц (subscription) зарахдаа Checkout API-г ашиглана уу.

Тоо ширхэг

Мөр бүр тогтмол тоо ширхэгтэй (хамгийн багадаа 1). «Худалдан авагч тоо ширхэгээ өөрчлөх боломжтой» гэснийг идэвхжүүлбэл худалдан авагч төлбөрийн хуудсан дээрээс тоогоо өөрөө сонгоно:

• Хамгийн бага — өгөгдмөл 1.
• Хамгийн их — хоосон үлдээвэл хязгааргүй.

Бүтээгдэхүүнд зарах тоо тохируулсан бол сонгож болох дээд хязгаар нь боломжит үлдэгдлээс хэтрэхгүй байхаар автоматаар багасна.

Худалдан авагчаас цуглуулах мэдээлэл

Тохиргоо	Өгөгдмөл	Тайлбар
Имэйл хаяг	Асууна	Худалдан авагчийн имэйлийг төлбөрийн явцад асууна.
Утасны дугаар	Асуухгүй	Утасны дугаар асууна.
Хүргэлтийн хаяг	Асуухгүй	Хүргэлтийн хаягийг бөглүүлнэ.
Хөнгөлөлтийн код	Хаалттай	Идэвхжүүлбэл худалдан авагч хөнгөлөлтийн код оруулж болно.

Цуглуулсан мэдээлэл checkout бүрийн хамт хадгалагдаж, checkout.completed webhook-д багтаж очно.

Барааны үлдэгдэлтэй ажиллах

Линк дээрх бүтээгдэхүүнд зарах тоо тохируулсан бол:

• Үлдэгдэл линкийн хамгийн бага хэрэгцээг хангахгүй болмогц линк «дууссан» хуудас харуулж, шинэ захиалга авахгүй. Нэг бүтээгдэхүүнийг олон мөрөнд зарж байвал мөрүүдийн нийлбэрээр тооцно.
• Худалдан авагчийн сонгож болох дээд тоо боломжит үлдэгдлээр хязгаарлагдана.
• Өөр худалдан авагчийн төлж дуусаагүй захиалга үлдэгдлийг түр эзэлдэг тул линк түр «дууссан» байж болно — тэр захиалга төлөгдөхгүй өнгөрвөл линк өөрөө дахин нээгдэнэ.

Үлдэгдлээ нэмбэл (эсвэл хязгаарыг нь авбал) линк ямар ч үйлдэлгүйгээр дахин зарж эхэлнэ.

Линкээ удирдах

• Идэвхгүй болгох / Идэвхжүүлэх — идэвхгүй линк нээгдэхгүй (404). Худалдан авалтыг түр зогсоохдоо үүнийг ашиглана.
• Засах — нэр, бүтээгдэхүүн, тохиргоог хэзээ ч өөрчилж болно. Өөрчлөлт дараагийн нээлтээс эхлэн үйлчилнэ.
• Устгах — төлбөр хийгдээгүй линкийг устгаж болно. Төлбөр хийгдсэн линк түүхээ хадгалахын тулд устгагдахгүй — идэвхгүй болгоно.
• Линкийн дэлгэрэнгүй хуудсанд төлөгдсөн захиалгууд (имэйл, дүн, огноо) жагсаана.

Тэмдэглэл

• Линк нээгдэх бүрд 24 цагийн хугацаатай шинэ checkout үүснэ. Линк өөрөө хугацаагүй, хэрэглээний хязгааргүй.
• Идэвхтэй линкийн тоо таны Byl багцаас хамаарна: Starter 5, Growth хязгааргүй. Тест горимд хязгаар үйлчлэхгүй. Хязгаарт хүрсэн бол багцаа дээшлүүлэх эсвэл ашиглахаа больсон линкээ идэвхгүй болгоно.
• Тест төслийн линк тест горимд ажиллана — live-д зарж эхлэхдээ live төсөл дээрээ линкээ үүсгэнэ.
• Линкээр төлөгдсөн худалдан авалт ердийн checkout.completed webhook болон мэдэгдэл илгээнэ.
• Төлбөрийн линкийг одоогоор зөвхөн удирдлагын булангаас удирдана (API байхгүй).

Дараагийн алхам

• Барааны үлдэгдэл — зарах тоо тохируулж, линкээ үлдэгдэлтэй уялдуулах
• Хөнгөлөлтийн код — линк дээрээ хөнгөлөлт зөвшөөрөх
• Webhook — төлбөр бүрийг системдээ автоматаар бүртгэх